Pone atenshon loke Beibel ta bisa:
“ I no bebe biña bira burachi, pasobra esei ta libertinahe, ma sea yená ku e Spiritu.”
(Efesionan 5:18)
1°- Pa wòrdu yená ku Spiritu Santu ta nifiká ku tin un espasio ku mester wòrdu okupá, ora e apostel Pablo ta bisa pa no bebe bira burachi e no kemen solamente di alkohol pero tambe di kos material, ku ta e naturalesa di ser humano i ta un deseo natural, esei tambe kemen ku tin un otro “kos” apart di Spiritu Santu ku ke okupá e lugá ei, bo mester komprondé ku nos ta papiando di un lugá of tereno desokupá of bashí, esei kemen ku e lugá of tereno ei por wòrdu invadí pa ken ku wak´e promé. Asina tambe ta sosodé na nos bida, si nos bida ta desokupá of bashí di e presensia di Dios mesora e lo wòrdu invadí pa e deseonan di karni, ta pesei e apostel a bisa na e kapitulo 4 versikulo 27 esaki: “ i no duna diabel oportunidat”, esei ta e prinsipal motivo ku nos tin pa no duna diabel oportunidat, si no ta e kaso e lo drenta i sigur pa destrui.
2°- Tin hopi manera di haña un lugá of tereno bashi, e por ta te asta un lugá yen di sushi. Bo mester tin kuidou ku loke bo ta warda na bo paden!, di mes ora un persona ta bashí di Spiritu Santu, e ta bira un “warehouse” di tur sorto di kos ku diabel por pone, por ehempel: Pensamentunan negativo, rabia, vengansa, odio, miedu, duda, etc etc. I tur esaki diabel ta hasi pa un proposito so, destruí kompletamente e bida di e persona, kaba hibe fiernu huntu kuné.
3°- Un tereno of lugá bashi tambe kemen ku tin un doño, i komo nos ta papiando di nos mes bida, nos paden, ta nos ta duna e vergunning sea un hende, un kos of diabel mes pa nan hasi loke nan ke ku esei (nos bida).
4°- Otro kos nos por trese dilanti di loke ta un tereno of lugá okupá, kemen einan tabata tin un soño, un deseo of un proyekto pa ku e lugá ei. Komo ku nos ta “gobierno” pa duna “vergunning”, nos ta disidí kua soño, deseo of proyekto lo wòrdu traha na nos bida, esun di hende, esun di diabel of esun di Dios. Djis pa bo no pensa hopi kua bo ke, lagami bisabo e soñonan di Dios pa ku bo: Bida ku abundansia, salú 100%, felis ku bo famia, un bida perfekto i di mes loke ta mas importante un lugá reservá na shelu.
Dios bendishonabo hopi mes!!!
